News


ఈ పెట్టుబడులు అందరికీ తగవు..!

Monday 17th February 2020
personal-finance_main1581914342.png-31846

  • ఎండోమెంట్‌ పాలసీల్లో ప్రయోజనం తక్కువే
  • యులిప్‌ ప్లాన్లలో చార్జీల భారం
  • స్మాల్‌క్యాప్‌ ఫండ్స్‌లో రిస్క్‌ పాళ్లు అపరిమితం
  • డెట్‌ ఫండ్స్‌లోనూ కొన్నింటిలో హై రిస్క్‌ 
  • సెక్టోరల్‌ ఫండ్స్‌ అన్ని కాలాలకూ తగవు 
  • పీఎంఎస్‌ సేవలు ధనిక ఇన్వెస్టర్లకే
  • పెట్టుబడికి ముందు తగినంత అవగాహన అవసరం

పెట్టుబడుల కోసం ఎన్నో సాధనాలు అందుబాటులో ఉన్నాయి. అయితే, అందరికీ అన్నీ సరిపోలవు. ఆయా ఉత్పత్తుల్లో సానుకూల, ప్రతికూలతలు ఉంటాయి. రిస్క్‌ కూడా ఉత్పత్తిని బట్టి మారిపోతుంది. రాబడులు కూడా అన్నింటిలోనూ ఒకే మాదిరిగా ఉండవు. కనుక ఇన్వెస్ట్‌ చేసే ముందు వాటి గురించి తెలుసుకోవడం ఎంతో అవసరం. ఉదాహరణకు బీమా సంస్థలు చక్కని రాబడుల గణాంకాలతో ఆకర్షించే ప్రయత్నం చేస్తుంటాయి. కానీ, బీమా అన్నది పెట్టుబడి సాధనం కాదు కదా..? మనకు తెలిసిన వారు బలవంతం చేస్తున్నారనో, మొహమాటం కొద్దో ఆయా సాధనాల్లో ఇన్వెస్ట్‌ చేస్తే ఎక్కువ సందర్భాల్లో ప్రతికూల ఫలితాలే ఎదురవుతాయి.​ అందుకే ఆర్థిక సాధనం ఏదైనా కానీయండి.. ‘ఇది నాకు సరిపోయేదేనా’? అని ప్రశ్నించుకోవాలి. దేశ జనాభాలో అధిక శాతం, పేద, మధ్యతరగతి వర్గీయులే. కనుక అధిక శాతం మందికి నప్పని ఆర్థిక ఉత్పత్తుల గురించి ‘స్టెబుల్‌ ఇన్వెస్టర్‌’ వ్యవస్థాపకుడు ఆశిష్‌ వెల్లడించారు. 

ఎండోమంట్‌/మనీబ్యాక్‌ పాలసీలు...
ఎంతో ప్రాచుర్యం పొందిన సంప్రదాయ బీమా పాలసీలు ఇవి. తెలిసిన ఏజెంట్లు, సన్నిహితుల సూచనలతో దశాబ్దాలుగా వీటిని తీసుకుంటున్న వారు చాలా మంది ఉన్నారు. నిజానికి ఇవి బీమా రక్షణకే పరిమితయ్యేవి కావు. రాబడులను కూడా ఇస్తాయి. పన్ను ప్రయోజనాలు కూడా ఉన్నాయి. నిజానికి ఎక్కువ మందిని ఆకర్షించే అంశాలు ఇవే. ఒకవైపు బీమా రక్షణనిస్తుందని, మరోవైపు జీవించి ఉన్నా కూడా చివర్లో మెచ్యూరిటీ లభిస్తుందని ఎక్కువ మంది వీటిని సంకోచించకుండా తీసుకుంటుంటారు. ఈ ప్రయోజనాలున్నది నిజమే. కానీ, వాస్తవానికి ఈ బీమా పాలసీల్లో రాబడులు సగటున 5 శాతంగానే ఉంటాయి. వాస్తవానికి దీన్ని రాబడి రేటుగా చూడలేము. ఎందుకంటే ద్రవ్యోల్బణం రేటు కూడా సగటున ఇంతే ఉంటుంది. దీంతో పాలసీలపై రాబడిని ద్రవ్యోల్బణం మింగేయగా, పాలసీదారులకు మిగిలే రాబడి సున్నాయే. పోనీ బీమా రక్షణ అయినా కుటుంబాన్ని ఆదుకునే విధంగా ఉంటుందా...? అంటే లేదనే చెప్పాల్సి ఉంటుంది. ఎందుకంటే రూ.లక్ష బీమా కవరేజీతో కూడిన ఎండోమెంట్‌ పాలసీల్లో వార్షిక ప్రీమియం రూ.5,000-7,000 మధ్య ఉంటుంది. కానీ, ఆరోగ్యవంతుడైన 30 ఏళ్ల వ్యక్తి రూ.5,000 వార్షిక ప్రీమియంతో రూ.50 లక్షల టర్మ్‌ పాలసీని తీసుకునే అవకాశం ఉంది. అంటే, దురదృష్టవశాత్తూ పాలసీదారు మరణిస్తే అతనిపై ఆధారపడిన కుటుంబానికి రూ.50లక్షలతో మెరుగైన రక్షణ ఇచ్చినట్టు అవుతుంది. ఒకవేళ రాబడి కోసమే అయితే పీపీఎఫ్‌లో డిపాజిట్‌ చేసుకున్నా పన్ను ఆదాతో కూడిన 8 శాతం రాబడులు పొందొచ్చు. కనుక ఈ ఉత్పత్తులను తీసుకునే ముందు ఒకటికి రెండు సార్లు ఆలోచించడం మంచిది.

యులిప్‌ పాలసీలు...
యులిప్‌ పాలసీలు కూడా ఎండోమెంట్‌ పాలసీల తరహా ఉత్పత్తులేనని చెప్పుకోవాల్సి ఉంటుంది. కాకపోతే సంప్రదాయ ఎండోమెంట్‌ పాలసీలు ప్రీమియం ఆదాయాన్ని డెట్‌సెక్యూరిటీల్లో ఇన్వెస్ట్‌ చేసి రాబడులు పంచుతాయి. యులిప్‌లు మాత్రం ఈక్విటీల్లో పెట్టుబడుల అవకాశాలను కల్పిస్తాయి. దీంతో ఎండోమెంట్‌ ప్లాన్లతో పోలిస్తే యులిప్‌ ప్లాన్లలో దీర్ఘకాలానికి మెరుగైన రాబడులకు అవకాశం ఉంటుంది. కానీ బీమా, పెట్టుబడులను కలపకూడదన్నది ఆర్థిక నిపుణుల సూచన. ఈ రెండింటినీ వేర్వురుగానే ఉంచాలి. ఒక్కటిగా కలసి ఉండడం వల్ల రెండు ఉద్దేశ్యాల్లో ఏ ఒక్కటి పూర్తి స్థాయిలో నెరవేరదు. ఎలా అంటే ఉదాహరణకు.. యులిప్‌ ప్లాన్లలో కనీస వార్షిక ప్రీమియం రూ.12,000గా ఉంటుంది. దీనిపై 10 రెట్లు అంటే రూ.1.2 లక్షల బీమా కవరేజీ లభిస్తుంది. రూ.24,000 చెల్లిస్తే వచ్చే బీమా రక్షణ రూ.2.4 లక్షలు మాత్రమే. ముఖ్యంగా యులిప్‌ ప్లాన్లలో బీమా రక్షణ తగినంత పొందడం కష్టంగానే ఉంటుంది. ఎక్కువ రక్షణ కోసం భారీ ప్రీమియం చెల్లించుకోవాలి. అందరికీ అంత శక్తి ఉండకపోవచ్చు. పైగా యులిప్‌ ప్లాన్లలో చార్జీల భారం ఎక్కువ. దీర్ఘకాలంలో (పదేళ్లకు పైబడి) రాబడులు 7-8 శాతం వరకు ఉండొచ్చు. ఒకవేళ భారీ ప్రీమియం చెల్లించే వీలున్న వారు.. విడిగా టర్మ్‌ ప్లాన్‌, పెట్టుబడుల కోసం ఈక్విటీ మ్యూచువల్‌ ఫండ్స్‌ లేదా రిస్క్‌ వద్దనుకునేవారు పీపీఎఫ్‌ ఎంచుకోవడం మంచి నిర్ణయం అవుతుంది. 
 

స్మాల్‌క్యాప్‌ ఫండ్స్‌...
ఈక్విటీల్లో స్మాల్‌ క్యాప్‌ షేర్లు, స్మాల్‌క్యాప్‌ ఫండ్స్‌ కూడా ఎక్కువ మందికి తగని ఉత్పత్తులే. ఎందుకంటే వీటిలో రిస్క్‌ పాళ్లు ఎంతో ఎక్కువ. నాణ్యమైన స్మాల్‌ క్యాప్‌ కంపెనీల్లో పెట్టుబడులపై దీర్ఘకాలంలో మంచి రాబడులు వస్తాయని ఆశించొచ్చు. కానీ, ఆర్థిక రంగ ప్రతికూల పరిస్థితుల్లో.. అలాగే కంపెనీలో పాలనా, వ్యాపార పరమైన ప్రతికూల అంశాలు ఏవైనా వెలుగు చూస్తే పెట్టుబడిలో అధిక శాతం హరించుకుపోయే ప్రమాదం ఉంటుంది. వెంటనే విక్రయించి వచ్చినంత తీసుకునే అవకాశం కూడా ఉండకపోవచ్చు. ఎందుకంటే చిన్న కంపెనీలు కనుక లిక్విడిటీ వీటిల్లో తక్కువగా ఉంటుంది. రిస్క్‌ ఉన్నా ఫర్వాలేదనుకునే వారు, పెట్టుబడి నష్టపోయినా ఫర్వాలేదనుకునే వారు, తమ పెట్టుబడులను పరిస్థితులకు అనుగుణంగా దీర్ఘకాలం పాటు కొనసాగించే వెసులుబాటు ఉన్నవారే వీటిని పరిశీలించాలి.

సెక్టోరల్‌/ థీమ్యాటిక్‌ ఫండ్స్‌...
మ్యూచువల్‌ ఫండ్స్‌లలో ఎంపిక చేసిన రంగంలో ఇన్వెస్ట్‌ చేసే సెక్టోరల్‌/థీమ్యాటిక్‌ ఫండ్స్‌ కూడా ఉన్నాయి. ఉదాహరణకు బ్యాంకింగ్‌ సెక్టార్‌ ఫండ్‌, ఇన్‌ఫ్రా సెక్టార్‌ ఫండ్‌. ఆయా రంగాల పట్ల లోతైన అవగాహన ఉన్న వారు వీటిని ఎంచుకోవడంలో తప్పులేదు. కానీ, కనీస అవగాహన లేని వారు వీటికి దూరంగా ఉండడమే మంచిది. ఎందుకంటే కొన్ని రంగాలు అన్ని కాలాల్లోనూ అద్భుత పనితీరు చూపించలేవు. ఉదాహరణకు ఇన్‌ఫ్రా, విద్యుత్‌ రంగ కంపెనీలనే తీసుకుందాం.. ఇవి 2005-2008 కాలంలో అద్భుతమైన పనితీరు చూపించాయి. ఈ రంగాల షేర్లు ఎన్నో రెట్లు పెరిగాయి. కానీ, ఆ తర్వాత అంతర్జాతీయ ఆర్థిక సంక్షోభంతో ఇవి కుదేలయ్యాయి. అప్పటి నుంచి ఈ రంగాల షేర్లు మళ్లీ ఆ స్థాయి ర్యాలీ ఇంత వరకు చేయలేదు. భవిష్యత్తులో ఇవి ర్యాలీ చేసే అవకాశం ఎప్పుడో ఒకప్పుడు ఉంటుంది. కానీ, 2007లో ఈ కంపెనీల్లో ఇన్వెస్ట్‌ చేసిన వారి పరిస్థితి ఒక్కసారి ఊహించుకోండి. కానీ, బ్యాంకింగ్‌ రంగం ఇప్పటి వరకు అన్ని ర్యాలీల్లోనూ పాల్గొంటోంది. ఎందుకంటే ఆర్థిక వ్యవస్థకు ఈ రంగం హృదయం వంటిది. అలాగే, మరికొన్ని రంగాలూ ఏళ్ల తరబడి ర్యాలీకి దూరంగా ఉండొచ్చు. అందుకే విస్తృతమైన పరిజ్ఞానం, అవగాహన ఉన్న వారు తప్పించి మిగిలిన వారు ఈ తరహా పథకాలకు దూరంగా ఉండడమే శ్రేయస్కరం. 
 

పోర్ట్‌ఫోలియో మేనేజ్‌మెంట్‌ సర్వీసెస్‌ (పీఎంఎస్‌)
మ్యూచువల్‌ ఫండ్స్‌ ఇన్వెస్టర్ల పెట్టుబడులను వివిధ పథకాల రూపంలో నిర్వహిస్తాయి. పోర్ట్‌ఫోలియో మేనేజ్‌మెంట్‌ సర్వీసెస్‌ సంస్థలు నేరుగా స్టాక్స్‌లో ఇన్వెస్ట్‌మెంట్‌ సేవలు అందిస్తుంటాయి. ప్రతీ ఇన్వెస్టర్‌ లక్ష్యాలకు అనుగుణంగా పోర్ట్‌ఫోలియో డిజైన్‌, నిర్వహణ, మార్పులు, చేర్పులతో మ్యూచువల్‌ ఫండ్స్‌ కంటే అధిక రాబడులను ఇచ్చే ప్రయత్నం చేస్తుంటాయి. అయితే, పీఎంఎస్‌లో కనీస పెట్టుబడి రూ.25లక్షలుగా ఉంది. అధిక రాబడుల కోసం అధిక రిస్క్‌ తీసుకుని మరీ ఇన్వెస్ట్‌ చేస్తుంటాయి. దీంతో కొన్ని సందర్భాల్లో రిస్క్‌ పాళ్లు అధికంగా ఉంటుంటాయి. దీంతో మార్కెట్‌ పతనాల్లో పీఎంఎస్‌ పోర్ట్‌ఫోలియోల్లోనూ నష్టాలు భారీగానే ఉంటాయి. ధనిక ఇన్వెస్టర్ల కోసం ఉద్దేశించినవి ఇవి. ధనిక ఇన్వెస్టర్లు అధిక రాబడుల కోసం తమ పెట్టుబడుల్లో కొంత మొత్తాన్ని వీటికి కేటాయించుకుంటారు. చిన్న ఇన్వెస్టర్లు పీఎంఎస్‌ కాకుండా ఈక్విటీ మ్యూచువల్‌ ఫండ్స్‌లో బ్యాలన్స్‌డ్‌ ఫండ్స్‌, మల్టీక్యాప్‌ ఫండ్స్‌ను పరిశీలించొచ్చు.

డెట్‌ ఫండ్స్‌లో కొన్ని...
డెట్‌ ఫండ్స్‌లో రిస్క్‌ ఉండదని అనుకుంటుంటారు. కానీ, డెట్‌ ఫండ్స్‌లోనూ రిస్క్‌ అధికంగా ఉండే సాధనాలు ఉన్నాయి. అలాగే, రిస్క్‌ చాలా తక్కువ ఉండేవీ ఉన్నాయి. సెబీ 2018లో మ్యూచువల్‌ ఫండ్స్‌ పథకాల పునర్‌వర్గీకరణ అనంతరం 15-20 రకాల డెట్‌ ఫండ్స్‌ అందుబాటులో ఉన్నాయి. వీటిల్లో లిక్విడ్‌ ఫండ్‌, లో డ్యురేషన్‌, అల్ట్రా షార్ట్‌ డ్యురేషన్‌, షార్ట్‌ డ్యురేషన్‌, మనీ మార్కెట్‌ ఫండ్స్‌లో తమకు అనుకూలమైన వాటిల్లో రిటైల్‌ ఇన్వెస్టర్లు ఇన్వెస్ట్‌ చేసుకోవచ్చు. ఎందుకంటే వడ్డీ రేట్ల అస్థిరతల రిస్క్‌ వీటిల్లో చాలా చాలా తక్కువగా ఉంటుంది. క్రెడిట్‌రిస్క్‌ కూడా తక్కువే ఉంటుంది. ఇవి మినహా మిగిలిన డెట్‌ ఫండ్స్‌ ఎక్కువ మందికి నప్పేవి కావు. ఎందుకంటే ఇవి దీర్ఘకాలానికి సంబంధించినవి. కనక వడ్డీ రేట్ల రిస్క్‌ వీటిల్లో ఎక్కువగా ఉంటుంది. క్రెడిట్‌ రిస్క్‌ ఫండ్స్‌ అయితే తక్కువ క్రెడిట్‌ రేటింగ్‌ ఉన్న సాధనాల్లో ఇన్వెస్ట్‌ చేస్తుంటాయి. వీటిల్లో రిస్క్‌ మరీ ఎక్కువ. పరిస్థితులు అనుకూలిస్తే రాబడులు ఎక్కువగా ఉంటాయి. రిస్క్‌ తీసుకునే వారికి ఈక్విటీ పథకాలు ఉన్నాయి. రిస్క్‌ తీసుకోవడం ఇష్టంలేని వారే ఎక్కువగా డెట్‌ పథకాలను పరిశీలిస్తుంటారు. కనుక వీరు డెట్‌ ఫండ్స్‌ కదా అని వేటిల్లో పడితే వాటిల్లో ఇన్వెస్ట్‌ చేస్తే చేదు ఫలితాలు రావచ్చు.

ఎన్‌సీడీలు/కంపెనీల డిపాజిట్లు...
బ్యాంకు డిపాజిట్లపై వడ్డీ రేట్లు 6.5-7 శాతానికి తగ్గిపోయాయి. కానీ, ఇదే సమయంలో 9, 10, 11 శాతం రాబడులతో కంపెనీలు జారీ చేసే నాన్‌ కన్వర్టబుల్‌ డిబెంచర్స్‌/డిపాజిట్లు ఇన్వెస్టర్లను ఆకర్షించే అవకాశం లేకపోలేదు. ఎన్‌సీడీల్లో సెక్యూర్డ్‌, నాన్‌ సెక్యూర్డ్‌ కూడా ఉంటాయి. నిజానికి రిస్క్‌ ఎక్కువ ఉంటేనే కంపెనీలు అధిక రేటును ఆఫర్‌ చేస్తాయి. అదే బజాజ్‌ ఫైనాన్స్‌ వంటి మంచి క్రెడిట్‌ రేటింగ్‌ ఉన్న కంపెనీలు ఎన్‌సీడీలు/బాండ్లపై ఆఫర్‌ చేసే రాబడి 8 శాతం మించదు. పైగా పెద్దగా పేరులేని కంపెనీలు కూడా నిధుల సమీకరణకు ఈ మార్గాలను ఎంచుకుంటుంటాయి. కనుక బ్యాంకు డిపాజిట్ల కంటే 3-4 శాతం అదనపు రాబడి కోసం అధిక రిస్క్‌ తీసుకోవడం రిటైల్‌ ఇన్వెస్టర్లకు సురక్షితం కాదు. వీటి కంటే బ్యాంకు డిపాజిట్లనే ఆశ్రయించడం సురక్షితం. పైగా ఒక్కో డిపాజిట్‌ దారునికి ఒక బ్యాంకు పరిధిలో బీమా రూ.లక్ష నుంచి ఇటీవలే రూ.5లక్షలకు పెంచారు. 



You may be interested

నేటి వార్తల్లోని షేర్లు

Monday 17th February 2020

వివిధ వార్తలకు అనుగుణంగా సోమవారం స్టాక్‌ మార్కెట్‌లో ప్రభావితమయ్యే షేర్లు ఎన్‌ఐఐటీ టెక్నాలజీస్‌: రూ.337.4 కోట్ల షేర్లను కొనుగోలు చేయడానికి వాటాదారులు అంగీకరించినట్లు ఈ కంపెనీ వెల్లడించింది. డీఎల్‌ఎఫ్‌:  జాయింట్‌ వెంచర్లలో ఉన్న భూములు విక్రయించడం ద్వారా రూ.2,000 కోట్ల నిధులు సమీకరించాలని డీఎల్‌ఎఫ్‌ భావిస్తోంది. ఆయిల్‌ ఇండియా: మూడు పార్టీలకు లీజుకిచ్చిన బ్యాండ్‌ విడ్త్‌ కు సంబంధించి గతంలో చెల్లించాల్సిన రూ.48,500 కోట్ల విషయంలో టెలికం విభాగంపై టీడీఎస్‌ఏటీకి వ్యతిరేకంగా ఫిర్యాదు చేయనున్నట్లు

ముత్తూట్‌ ఫైనాన్స్‌ షేరు రికార్డ్‌

Monday 17th February 2020

7 శాతం జంప్‌చేసిన షేరు క్యూ3 ఫలితాల ఎఫెక్ట్‌ బంగారు ఆభరణాలపై రుణాలిచ్చే ఎన్‌బీఎఫ్‌సీ.. ముత్తూట్‌ ఫైనాన్స్‌ లిమిటెడ్‌ కౌంటర్‌ జోరందుకుంది. ప్రస్తుత ఆర్థిక సంవత్సరం(2019-20) మూడో త్రైమాసికంలో ప్రోత్సాహకర ఫలితాలు సాధించడంతో హెచ్చుతగ్గుల మార్కెట్లోనూ ఈ కౌంటర్‌కు డిమాండ్‌ కనిపిస్తోంది. దీంతో ఉదయం 9.50 ప్రాంతంలో ఈ షేరు 7.2 శాతం జంప్‌చేసి రూ. 800 వద్ద ట్రేడవుతోంది. తొలుత ఒక దశలో రూ. 801ను అధిగమించింది. ఇది సరికొత్త గరిష్టంకావడం

Most from this category