News


పెద్దలకు హెల్త్‌ పాలసీ సాధ్యమే

Monday 15th July 2019
personal-finance_main1563171164.png-27067

  • ప్రీమియం మాత్రం ఖరీదు
  • అయినా సరే తీసుకోవడమే సురక్షితం
  • అప్పటికే ఉన్న వ్యాధులకూ కవరేజీ
  • కాకపోతే పరిమితులు ఎక్కువ
  • కోపేమెంట్‌, రూమ్‌రెంట్‌ క్యాప్‌ గమనించాలి
  • తక్కువ పరిమితులున్న పాలసీ బెటర్‌
  • పాలసీ లేకపోతే ఆర్థికంగా బోలేడు భారం
  • అందుకే 60 దాటితే హెల్త్‌ పాలసీ ఎంతో అవసరం

చెన్నైకు చెందిన సుమీత్‌ (60) ఇటీవలే పదవీ విరమణ చేశాడు. ప్రైవేటు రంగంలో పనిచేసినంత కాలం సంస్థ తరఫున గ్రూపు హెల్త్‌ ఇన్సూరెన్స్‌ పాలసీ అతడి కుటుంబ సభ్యుల అవసరాలను ఆదుకుంది. కానీ, ఉద్యోగానికి విరామం తీసుకోవడంతో ఇకపై తనకు హెల్త్‌ కవరేజీ ఉండదన్న విషయం తెలుసుకుని అతడు ఒక్కసారిగా ఆందోళనకు గురయ్యాడు. పోనీ, ఈ వయసులో హెల్త్‌ పాలసీ తీసుకుందామనుకున్నా... అతి సాధ్యమేనా? అన్నది అతడి సందేహం. అప్పటికే సుమీత్‌కు అధిక రక్తపోటు సమస్య కూడా ఉంది. ఈ పరిస్థితి సుమీత్‌ ఒక్కడికే కాదు... ఎంతో మందికి ఎదురయ్యేదే. కానీ, పరిస్థితులు మారాయి. సీనియర్‌ సిటిజన్లకు ప్రత్యేకంగా రూపొందించిన హెల్త్‌ పాలసీలను నేడు ఎన్నో కంపెనీలు అందిస్తున్నాయి. కాకపోతే, ఏ పాలసీ తీసుకోవాలన్నది తేల్చుకోవాలంటే, వాటికి సంబంధించి అన్ని అంశాలనూ తెలుసుకోవాలి. వాటిని తెలియజేసే ఆరోగ్య కథనమే ఇది. 

ఖరీదైనా సరే...
సాధారణ పాలసీలు అయితే వయసురీత్యా ప్రవేశానికి పరిమితులు ఉంటున్నాయి. ఈ పాలసీలను 60-65 ఏళ్ల తర్వాత తీసుకోవడం కష్టమే. అదే సీనియర్‌ సిటిజన్‌ పాలసీలు అయితే, ఏ ఇబ్బంది లేకుండా తీసుకోవచ్చు. ‘‘మా సీనియర్‌ సిటిజన్‌ పాలసీ చాలా పెద్ద వయసులో అంటే 65-74 మధ్యనున్న వారు కూడా తీసుకోవచ్చు’’ అని స్టార్‌ హెల్త్‌ అండ్‌ అలైడ్‌ ఇన్సూరెన్స్‌ జాయింట్‌ ఎండీ ఎస్‌.ప్రకాష్‌ తెలిపారు. అయితే, పెద్ద వయసులో లభించే హెల్త్‌ పాలసీల ప్రీమియం చౌకగా మాత్రం ఉండదు. ఎందుకంటే వయసు పెరుగుతున్న కొద్దీ వ్యాధుల బారిన పడే ప్రమాదం ఎక్కువ ఉంటుంది. అందుకే బీమా కంపెనీలు అధిక ప్రీమియాన్ని వసూలు చేస్తుంటాయి. చిన్న వయసులోనే హెల్త్‌ పాలసీ తీసుకున్నా గానీ, పెరిగే వయసుకు అనుగుణంగా వారి ప్రీమియం సైతం అధికమవుతూ ఉంటుంది. ‘‘కాస్త చిన్న వయసులోనే పాలసీ తీసుకుంటే నో క్లెయిమ్‌ బోనస్‌ ప్రయోజనం లభిస్తుంది. ముందస్తు వ్యాధుల కవరేజీ కోసం వారు వేచి ఉండాల్సిన ఇబ్బంది తప్పుతుంది’’ అని జేఎల్‌టీ ఇండిపెండెంట్‌ ఇన్సూరెన్స్‌ బ్రోకర్స్‌ లీడ్‌ పార్ట్‌నర్‌ అర్హత్‌గోటడ్కే తెలిపారు. 

అయితే, ప్రీమియం ఎక్కువైనా కానీ సీనియర్ సిటిజన్లు అనారోగ్యం కారణంగా ఆర్థికంగా గుల్ల కాకుండా ఉండేందుకు హెల్త్‌ పాలసీ తీసుకోడమే సరైనదన్నది నిపుణులు ఇచ్చే సలహా. ‘‘ప్రీమియం రూ.25,000-30,000 ఖరీదుగా భావించొచ్చు. కానీ, కొన్ని సందర్భాల్లో పెద్ద చికిత్స తీసుకోవాల్సి వస్తే అందుకు రూ.లక్షలు ఖర్చు పెట్టాల్సి రావచ్చు. ఆ తరహా సందర్భాల్లో ఈ ప్రీమియం చూడ్డానికి చిన్న మొత్తంగానే కనిపిస్తుంది’’అని ఆదిత్య బిర్లా హెల్త్‌ ఇన్సూరెన్స్‌ సీఈవో మయాంక్‌ బత్వాత్‌ అన్నారు. అత్యవసర నిధి కలిగి ఉన్న వారు సైతం హెల్త్‌ పాలసీ తీసుకోవడం ఎంతో అవసరం అంటున్నారు నిపుణులు. ‘‘ఏదైనా పెద్ద వ్యాధి బారిన పడితే మీ మొత్తం నిధి అంతా కరిగిపోవచ్చు. చివరికి ఏ కొద్ది మొత్తానికో పరిమితం కావచ్చు’’ అని ప్రకాష్‌ అన్నారు. 

అపోహలు...
అప్పటికే ఆరోగ్య సమస్యలు ఉన్న వృద్ధులకు హెల్త్‌ పాలసీలు లభించడం కష్టమని చాలా మంది భావిస్తుంటారు. కష్టమైనా కానీ, హెల్త్‌ కవరేజీ పొందడం అసాధ్యమేమీ కాదని బ్యాంక్‌ బజార్‌ చీఫ్‌ బిజినెస్‌ ఆఫీసర్‌ నవీన్‌ చందాని అన్నారు. వేతన జీవుల్లో ఎక్కువ మంది సాధారణంగా తమ వృద్ధులైన తల్లిదండ్రుల కోసం ప్రత్యేకంగా పాలసీ తీసుకోరు. గ్రూపు హెల్త్‌ పాలసీలో వారికి కూడా కవరేజీ ఉండడం వల్లే అలా చేస్తుంటారు. ‘‘కార్పొరేట్‌ హెల్త్‌ కవరేజీ రూ.2-5 లక్షలకు మించదు. కనుక ఇది సరిపోదు. ఒకవేళ ఉద్యోగం కోల్పోయినా లేక ఉద్యోగం వీడి సొంతంగా వ్యాపారం ప్రారంభించాలనుకుంటే ఏం చేస్తారు?’’ అని ప్రశ్నించారు బత్వాల్‌. అలాగే, వృద్ధులు తమ దృష్టికి వచ్చిన హెల్త్‌పాలసీ తీసుకోవడానికే మొగ్గు చూపుతుంటారు. అయితే, అలా చేయడానికి ముందు అందులో ఉన్న ప్రయోజనాలు, మినహాయింపులు అన్నింటినీ తెలుసుకోవాలన్నది నిపుణుల సూచన. ఎన్నో ఆప్షన్లు అందుబాటులో ఉంటున్నాయని, అన్నింటినీ పరిశీలించిన తర్వాతే తమకు అనువైన పాలసీని ఎంచుకోవాలని సూచిస్తున్నారు. 

పెద్ద వయసులో తీసుకునే పాలసీలో ముఖ్యంగా చూడాల్సినది బీమా కవరేజీ మొత్తం పెంచుకోవడానికి అవకాశం ఉందా? అని. పైలట్‌ పాలసీ కాకుండా పూర్తి స్థాయి పాలసీ తీసుకోవాలి. అప్పటికే ఉన్న వ్యాధుల కవరేజీకి ఎంత కాలం వేచి ఉండాలన్నది కూడా పరిశీలించాలి. ‘‘ఇది 18 నెలల నుంచి నాలుగేళ్ల వరకు ఉంటుంది. తక్కువ వెయిటేజీ పీరియడ్‌ ఉన్న పాలసీని ఎంచుకోవాలి’’ అని సింబో ఇన్సూరెన్స్‌ సీఈవో అనిక్‌ జైన్‌ సూచించారు. ఇక సీనియర్‌ సిటిజన్‌ పాలసీల్లో కోపేమెంట్‌ (క్లెయిమ్‌లో పాలసీదారులు తమ వంతు వెచ్చించాల్సిన మొత్తం) ఎక్కువగా ఉంటుంది. ‘‘10 శాతం కోపేమెంట్‌ అయితే ఫర్వాలేదు. 30 శాతం అయితే చాలా కష్టమవుతుంది’’ అని జైన్‌ అన్నారు. ఇక రూమ్‌ రెంట్‌పై సబ్‌లిమిట్‌ ఉందేమో కూడా చూడాలి. అలాగే, ఐసీయూ చార్జీలు, వ్యాధుల వారీగా చికిత్సల పరిమితులు కూడా ఉన్నాయేమో ముందుగానే విచారించుకోవాలి. పరిమిత షరతులు ఉన్న పాలసీని ఎంచుకోవడమే సరైనది.

అన్ని వివరాలు వెల్లడించడమే మేలు...
హెల్త్‌ పాలసీకి దరఖాస్తు చేసుకోవడానికి ముందుగా ఓ పేపర్‌పై మీకున్న ఆరోగ్య సమస్యల వివరాలన్నీ నమోదు చేసుకోవాలి. ఆ తర్వాత హెల్త్‌పాలసీ ప్రపోజల్‌ ఫామ్‌లో ఆ వివరాలన్నింటినీ వెల్లడించడం మంచి నిర్ణయం అవుతుంది. ఎందుకంటే పూర్తి వివరాలు వెల్లడించకపోవడం క్లెయిమ్‌లు తిరస్కరణకు కారణమవుతున్న వాటిల్లో ముఖ్యమైనది. అందుకే ఈ విషయాన్ని సీరియస్‌గా తీసుకోవాలి. పాలసీ పత్రంలోని అన్ని నియమ, నిబంధనలు, షరతులను పూర్తిగా చదవడం మంచిది. ఆ తర్వాత స్వయంగా దరఖాస్తు పూర్తి చేయాలి. 

ప్రపోజల్‌ తిరస్కరణ...
సీనియర్‌ సిటిజన్‌ పాలసీల్లో ప్రపోజల్‌ తిరస్కరణ ఎదురయ్యే అవకాశాలు లేకపోలేదు. ఒకవేళ ఒక కంపెనీ పాలసీ ప్రపోజల్‌ను తిరస్కరిస్తే, మరో కంపెనీ నుంచి పాలసీ తీసుకునేందుకు ప్రయత్నించాలి. అంతేకానీ, ఈ వయసులో రాదులేనన్న అపోహతో ఆగిపోవద్దు. ఎందుకంటే ఒక్కో కంపెనీకి భిన్నమైన అండర్‌రైటింగ్‌ విధానాలు ఉండొచ్చు. ఒక కంపెనీ రిస్కీ ప్రపోజల్‌ను కాదనుకుంటే, మరో బీమా కంపెనీ అదే తరహా రిస్కీ కేసులకు పాలసీలను జారీ చేయవచ్చు. ఒకవేళ విడిగా పాలసీ పొందలేకపోతే, అప్పుడు బ్యాంకు ఖాతాదారునిగా గ్రూపు హెల్త్‌ పాలసీ కోసం ప్రయత్నించొచ్చని జైన్‌ సూచించారు. పైగా నిబంధనలు, షరతులు కూడా సులభంగానే ఉంటాయన్నారు. ఏ మార్గంలోనూ పాలసీ లభించని వారి ముందున్న మార్గం వైద్య అత్యవసర నిధిని ఏర్పాటు చేసుకోవడమే. 


‘‘సంపూర్ణ రక్షణతోపాటు తక్కువ పరిమితులు ఉన్న పాలసీని ఎంచుకోవాలి. తగినంత బీమాను, మీరు గరిష్టంగా భరించేంత ప్రీమియం వరకు తీసుకోవాలి’’
- మయాంక్‌ బత్వాల్‌, చీఫ్‌ ఎగ్జిక్యూటివ్‌ ఆఫీసర్‌, ఆదిత్య బిర్లా హెల్త్‌ ఇన్సూరెన్స్‌

‘‘మీకు ఆఫర్‌ చేసే పాలసీలో అన్నీ ఉన్నాయా అన్నది చూసుకోవాలి. అది పైలట్‌ పాలసీ కాకూడదు. రెండోది అయితే ఆ తర్వాత ఏ సమయంలోనైనా నిలిపివేయవచ్చు’’ 
- ఎస్‌.ప్రకాష్‌, జాయింట్‌ మేనేజింగ్‌ డైరెక్టర్‌, స్టార్‌ హెల్త్‌ అండ్‌ అలైడ్‌ ఇన్సూరెన్స్‌

    



You may be interested

క్రెడిట్‌ రిస్క్‌ నిర్వహణ చాలా ముఖ్యం

Monday 15th July 2019

డెట్‌ మ్యూచువల్‌ ఫండ్స్‌లో క్రెడిట్‌ రిస్క్‌ ఫండ్‌ అన్నది ఓ విభాగం. తక్కువ రేటింగ్‌ ఉన్న డెట్‌ సాధనాల్లో ఈ పథకం ప్రధానంగా ఇన్వె‍స్ట్‌ చేస్తుంది. సెబీ మార్గదర్శకాల ప్రకారం... క్రెడిట్‌ రిస్క్‌ ఫండ్స్‌ ప్రధానంగా 65 శాతం పెట్టుబడులను ఏఏ అంతకంటే తక్కువ రేటింగ్‌ ఉన్న పేపర్లలో ఇన్వెస్ట్‌ చేయాల్సి ఉంటుంది. అధిక రిస్క్‌ తీసుకునే సామర్థ్యం ఉన్న వారు, వీటిల్లో ఇన్వెస్ట్‌ చేయడం ద్వారా రెండంకెల రాబడులు

31 శాతం క్రాష్‌....10 ఏళ్ల కనిష్ఠానికి డీహెచ్‌ఎఫ్‌ఎల్‌

Monday 15th July 2019

గత కొన్ని క్వార్టర్లలో జరిగిన పరిణామాల కారణంగా..భవిష్యత్తులో కంపెనీగా కొనసాగలేమోనన్న ఆందోళనను హౌసింగ్‌ ఫైనాన్స్‌ కంపెనీ డీహెచ్‌ఎఫ్‌ఎల్‌ వ్యక్తం చేయడంతో సోమవారం(జులై 15) ట్రేడింగ్‌లో కంపెనీ షేరు విలువ 30.58 శాతం పడిపోయి రూ.47.55 వద్ద ట్రేడవుతోంది. సోమవారం రూ.61.65 వద్ద ప్రారంభమైన ఈ షేరు జీవితకాల కనిష్ఠానికి పడిపోయింది.  ఆర్థికంగా తీవ్ర ఒత్తిడి  గత ఆర్థిక సంవత్సరం(2018-19) నాలుగో క్వార్టర్‌లో రూ.2,224 కోట్ల నికర నష్టాలు వచ్చాయని డీహెచ్‌ఎఫ్‌ఎల్‌ తెలిపింది. రూ.3,280

Most from this category