News


బీమా పాలసీ కొనసాగించలేకపోతున్నారా?

Monday 18th November 2019
personal-finance_main1574048765.png-29656

-మీ ముందు రెండు మార్గాలు
-పాలసీని సరెండర్‌ చేయడం
-పాలసీని పెయిడప్‌గా మార్చుకోవడం
-సరెండర్‌ చేస్తే బీమా కవరేజీని నష్టపోతారు
-పెయిడప్‌గా మార్చుకుంటే బీమా కొనసాగుతుంది
-ప్రీమియం చెల్లించాల్సిన భారం తగ్గుతుంది
-చివర్లో మెచ్యూరిటీ కూడా అందుకోవచ్చు

కారణాలేవైనా కానీ  మీరు తీసుకున్న బీమా పాలసీని కొనసాగించలేకపోతున్నారా..? ప్రీమియం చెల్లింపును భారంగా భావిస్తున్నారా..? దీంతో పాలసీని రద్దు చేసుకోవాలని అనుకుంటున్నారా..? అయితే మీ ముందు ఓ చక్కని మార్గం ఉంది. పాలసీ ప్రీమియం చెల్లించకపోతే అది ల్యాప్స్‌ అయిపోతుంది. దీనికంటే పెయిడప్‌ పాలసీగా మార్చుకుంటే సరి. ఈ అవకాశం ఎండోమెంట్‌ పాలసీల్లో ఉంటుంది. ఎండోమెంట్‌ పాలసీలు బీమా రక్షణతోపాటు, పాలసీ కాల ‍వ్యవధి ముగిసిన తర్వాత కూడా పాలసీదారు జీవించి ఉంటే మెచ్యూరిటీ లభిస్తుంది. ఈ ఎండెమెంట్‌ పాలసీ కాల వ్యవధి ముగియక ముందే దాన్ని నిలిపివేయాలని భావిస్తే రెండు మార్గాలు ఉన్నాయి. దాన్ని పెయిడప్‌ పాలసీగా మార్చుకోవడం ఒకటి. ఇలా చేస్తే బీమా కవరేజీ కొనసాగుతుంది. లేదా పాలసీని బీమా సంస్థకు స్వాధీనం చేసి సరెండర్‌ వ్యాల్యూని పొందడం. ఈ రెండు మార్గాల్లో ఉన్న మంచి చెడులను తెలియజేసే కథనమే ఇది. 

పెయిడప్‌ పాలసీ
పెయిడప్‌ పాలసీ ఆప్షన్‌లో జీవిత బీమా నిర్ణీత కాలం వరకు కొనసాగడం అనుకూలతగా చెప్పుకోవాలి. అంటే ప్రీమియం చెల్లించకపోయినా కానీ, ఈ కవరేజీ కొనసాగుతుంది. అలాగే, పాలసీ కాల వ్యవధి సమయంలో పాలసీదారు మరణిస్తే సమ్‌ అష్యూరెన్స్‌ (బీమా మొత్తం)ను నామినీకి చెల్లించడం జరుగుతుంది. పాలసీదారు జీవించి ఉంటే మెచ్యూరిటీ లభిస్తుంది. కాకపోతే పాలసీని పెయిడప్‌గా మార్చుకుంటే చివర్లో వచ్చే ప్రయోజనాలు కొంత తగ్గిపోతాయి. ఎందుకంటే అప్పటి నుంచి ప్రీమియం చెల్లించరు కనుక. దాంతో కాల వ్యవధి తీరిన తర్వాత పాలసీదారుకు లభించే మొత్తం తగ్గుతుంది. పెయిడప్‌గా మార్చిన నాటి నుంచి ప్రీమియం చెల్లించరు కనుక వార్షికంగా తాజా బోనస్‌లు కూడా నిలిచిపోతాయి. అప్పటి వరకు సమకూరిన బోనస్‌లను కాల వ్యవధి తీరిన తర్వాత చెల్లిస్తారు. ‘‘ఇటీవలి కాలం వరకు పెయిడప్‌గా మార్చుకునేట్టు అయితే కనీసం కొన్ని సంవత్సరాల వరకు ప్రీమియం చెల్లించాల్సి వచ్చేది. మిగిలి ఉన్న కాలం పదేళ్లలోపు అయితే, కనీసం రెండు సంవత్సరాల ప్రీమియం చెల్లించడం ద్వారా పెయిడప్‌కు బీమా కంపెనీలు అవకాశం కల్పించేవి. అదే 10 ఏళ్లు అంతకంటే ఎక్కువ కాల వ్యవధి మిగిలి ఉన్న పాలసీల్లో పెయిడప్‌కు కనీసం మూడేళ్ల ప్రీమియం చెల్లించాల్సి వచ్చేది. అయితే, ఇటీవలి ఐఆర్‌డీఏఐ నాన్‌ లింక్డ్‌ ఇన్సూరెన్స్‌ ప్రొడక్ట్స్‌ నిబంధనలు 2019 ప్రకారం పెయిడప్‌కు అర్హమైన పాలసీల్లో చెల్లించాల్సిన కనీస ప్రీమియం రెండు సంవత్సరాలుగా నిర్దేశించడం జరిగింది. అంటే ఇంకా మిగిలి ఉన్న కాలంతో సంబంధం లేకుండా అన్ని పాలసీలకు పెయిడప్‌ విషయంలో రెండేళ్ల ప్రీమియం చెల్లిస్తే చాలు’’ అని హెచ్‌డీఎఫ్‌సీ లైఫ్‌ కంపెనీ తెలిపింది.
యూనిట్‌ లింక్డ్‌ ప్లాన్‌ (యులిప్‌)లను కూడా పెయిడప్‌ పాలసీలుగా మార్చుకోవచ్చు. అయితే, లాకిన్‌ పీరియడ్‌ వరకు (ఐదేళ్ల పాటు) అందులో కొనసాగాల్సి ఉంటుంది. పాలసీదారుపై చార్జీల భారం మాత్రం కొనసాగుతుంది. ఎందుకంటే యులిప్‌లలో జీవిత బీమా కవరేజీ రిస్క్‌ చార్జీలు పోను మిగిలిన మొత్తాన్ని ఈక్విటీ, డెట్‌లో ఇన్వెస్ట్‌ చేయడం జరుగుతుంది. కనుక ఫండ్‌ నిర్వహణ చార్జీలు కొనసాగుతాయి. నాన్‌ లింక్డ్‌ ఎండోమెంట్‌ పాలసీల్లో పెయిడప్‌గా మారిన తర్వాత ఎటువంటి చార్జీలను విధించడం జరగదు. 

స్వాధీనం చేస్తే..?
ఒకవేళ పాలసీలో కొనసాగకూడదని భావిస్తే దాన్ని స్వాధీనం చేసి స్వాధీన విలువను (సరెండర్‌ వ్యాల్యూ) పొందొచ్చు. సరెండర్‌ చేసినట్టయితే ఆ తర్వాత బీమా కవరేజీ కూడా ముగిసినట్టే. ఈ ఆప్షన్‌లోనూ కనీసం కొంత కాలం పాటు ప్రీమియం చెల్లింపు తర్వాతే సరెండర్‌ చేయడానికి వీలుంటుందని పాలసీబజార్‌ టర్మ్‌ ఇన్సూరెన్స్‌ హెడ్‌ అక్షయ వైద్య తెలిపారు. యులిప్‌లలో కనీసం ఐదేళ్లు కొనసాగిన తర్వాతే సరెండర్‌కు వీలుంటుంది. యులిప్‌లలో ఐదేళ్లు ప్రీమియం చెల్లింపు తర్వాత ఎప్పుడైనా స్వాధీనం చేసుకోవచ్చు. స్వాధీనం చేసే నాటికి ఉన్న ఫండ్‌ విలువను చెల్లించడం జరుగుతుంది. ముందుగా వైదొలిగినందుకు ఎటువంటి చార్జీల విధింపు ఉండదు. అదే నాన్‌ లింక్డ్‌ ప్లాన్‌లలో అయితే రెండేళ్ల తర్వాత స్వాధీనం చేయవచ్చు. సరెండర్‌ చార్జీలు ఎక్కువగా ఉంటాయని గుర్తుంచుకోవాలి. పాలసీ స్వాధీనం విషయంలో చెల్లించాల్సిన కనీస మొత్తాలను ఐఆర్‌డీఏఐ నిర్దేశించింది. అయితే, పాలసీ తొలి నాళ్లలో స్వాధీనం చేసినట్టయితే, చెల్లించిన ప్రీమియంలో 50 శాతం వరకు నష్టపోవాల్సి రావచ్చు. నాన్‌లింక్డ్‌ ఎండోమెంట్‌ ప్లాన్‌ను రెండో ఏడాది స్వాధీనం చేస్తే చెల్లించిన మొత్తం ప్రీమియంలో 30 శాతమే వెనక్కి వస్తుంది. మూడో ఏడాది స్వాధీనం చేస్తే 35 శాతం లభిస్తుంది. పాలసీ తొలినాళ్లలో ‍స్వాధీనం చేయడం ద్వారా ఎక్కువ మొత్తాన్ని నష్టపోవాల్సి ఉంటుంది. పాలసీ తొలి ఏడేళ్ల కాలంలో స్వాధీనం చేస్తే ఎంత మేర చెల్లించాలన్న దానిని ఐఆర్‌డీఏఐ పేర్కొంది. 

ఏది అనుసరించాలి..?
ఒక్కసారి ఎండోమెంట్‌ పాలసీని కొనుగోలు చేసిన తర్వాత కనీసం రెండేళ్లు అయినా ప్రీమియం చెల్లించడం అవసరం. అప్పుడే దాన్నుంచి పెద్దగా నష్టం లేకుండా బయటకు రావచ్చు. బీమాతోపాటు పొదుపు కలసిన పాలసీల్లో రెండేళ్లలోపే బయటపడితే వచ్చేదేమీ పెద్దగా ఉండదు. కనీసం రెండేళ్లు చెల్లించిన తర్వాత పెయిడప్‌, సరెండర్‌ ఆప్షన్లను పరిశీలించొచ్చు. అయినా కానీ తొలినాళ్లలో ఇలా చేయడం వల్ల అంత ప్రయోజం ఉండదు. పెయిడప్‌, సరెండర్‌ ఈ రెండింటిలో ఏది నయం? అన్న ప్రశ్నే ఎదురైతే పెయిడప్‌గా మార్చుకోవడమే మంచిది. ఎందుకంటే పెయిడప్‌ ఆప్షన్‌లో జీవిత బీమా రక్షణ కొనసాగుతుంది. కాల వ్యవధి తీరిన తర్వాత ఎంతో కొంత వెనక్కి వస్తుంది. పాలసీ కాల వ్యవధిలో మరణిస్తే నామినీకి పరిహారం దక్కుతుంది. మరో జీవిత బీమా పాలసీ తీసుకున్నా తర్వాతే ఒక పాలసీ నుంచి వెదొలగడాన్ని పరిశీలించాలని నిపుణుల సూచన. 



You may be interested

సౌదీ ఆరామ్‌కో ఐపీఓ సైజు 2,560 కోట్ల డాలర్లు !

Monday 18th November 2019

ప్రైస్‌బ్యాండ్‌ 8-8.5 డాలర్లు డిసెంబర్‌ రెండో వారంలో లిస్టింగ్‌ !  రియాద్‌: సౌదీ అరేబియా చమురు దిగ్గజం, సౌదీ ఆరామ్‌కో ఐపీఓ(ఇనీషియల్‌ పబ్లిక్‌ ఆఫర్‌) ప్రైస్‌బ్యాండ్‌ను నిర్ణయించింది. ఈ ఐపీఓలో భాగంగా 1.5 శాతం వాటా (సుమారుగా 300 కోట్ల షేర్లు)ను విక్రయించనున్నది. ప్రైస్‌బ్యాండ్‌ను 30-32 సౌదీ రియాల్స్‌ (8-8,5 డాలర్లు-సుమారుగా రూ.576-612 రేంజ్‌లో)గా నిర్ణయించింది. ఈ ప్రైస్‌బ్యాండ్‌ పరంగా చూస్తే, సౌదీ ఆరామ్‌కో కంపెనీ విలువ 1.60-1.71  లక్షల కోట్ల డాలర్లుగా

డెట్‌ ఫండ్స్‌లో ఇప్పుడు ఇన్వెస్ట్‌ చేయోచ్చా ?

Monday 18th November 2019

ధీరేంద్ర కుమార్‌ సీఈవో వ్యాల్యూ రీసెర్చ్‌ సీఈవో ప్ర: రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) ఇప్పటిదాకా రెపో రేటును ఐదు సార్లు తగ్గించి కదా! ఈ నేపథ్యంలో డెట్‌ ఫండ్స్‌లో ఇన్వెస్ట్‌ చేయడానికి ఇదే సరైన సమయమని మిత్రులు చెబుతున్నారు. డెట్‌ ఫండ్స్‌లో ఇన్వెస్ట్‌ చేయమంటారా ?  -హరిబాబు, ఏలూరు  జ: మీరు చేసే ఇన్వెస్ట్‌మెంట్స్‌... ఆర్‌బీఐ తీసుకునే నిర్ణయాలను బట్టి ఉండకూడదు. వడ్డీ రేట్లు ఎలా  ఉంటాయో అన్న అంచనాలను బట్టి

Most from this category