News

లిక్విడిటీ పెంచడమే లక్ష్యం
ద్వైమాసిక సమీక్షా సమావేశంలో భాగంగా రెపోరేట్‌ను 35 బీపీఎస్‌ మేర తగ్గిస్తున్నట్లు రిజర్వ్‌బ్యాంక్‌ ఆఫ్‌ ఇండియా ప్రకటించింది. ఆరుగురు సభ్యులతో కూడిన మానిటర్‌ పాలసీ కమిటీ తీసుకున్న ఈ నిర్ణయంతో రెపోరేట్‌  5.40 శాతానికి దిగివచ్చింది. ఆర్బీఐ పెట్టుకున్న దీర్ఘకాలిక ద్రవ్యోల్బణ టార్గెట్‌కు దిగువనే నిజ ద్రవ్యోల్బణం కదలాడుతుండడంతో రేట్‌కట్‌కు ఆర్‌బీఐకి మార్గం సుగమమైంది. మార్కెట్‌ వర్గాలు 25 బీపీఎస్‌ రేట్‌కట్‌ ఉండొచ్చని అంచనా వేశాయి. గత మూడు సమావేశాల్లో ఆర్‌బీఐ వరుసగా 25 బీపీఎస్‌ చొప్పున రేట్లను తగ్గిస్తూ వచ్చింది. తాజా రేట్‌కట్‌తో మొత్తం నాలుగు సమావేశాల్లో 1.1 శాతం మేర రెపోరేట్‌ను తగ్గించినట్లయింది. పండుగసీజన్‌ ఆరంభం కాబోతున్న తరుణంలో వడ్డీరేట్లను తగ్గించి రుణసరఫరా పెంచాలని ఈ రేట్‌కట్‌తో బ్యాంకులకు ఆర్‌బీఐ పరోక్ష దిశానిర్ధేశం చేసింది. తాజా నిర్ణయంతో వ్యవస్థలో లిక్విడిటీ పెరుగుతుందని ఆర్‌బీఐ గవర్నర్‌ ఆశాభావం వ్యక్తం చేశారు.

కొంతమంది అనలిస్టులు తాజా రేట్‌ కట్‌ 50 బీపీఎస్‌ ఉండాలని భావించినా, ఆర్‌బీఐ మాత్రం మరీ అంత దూకుడుగా వెళ్లలేదు. క్రమంగా రుతుపవనాలు విస్తరించి మంచి వర్షపాతం నమోదు కావడం కూడా ఆర్‌బీఐ దూకుడుగా వెళ్లకుండా అడ్డుకుంది. యూఎస్‌చైనా ట్రేడ్‌వార్‌ ఫలితంగా మరో రెండు మూడు త్రైమాసికాలు దేశీయంగా కూడా మందగమనం ఉండొచ్చని నిపుణులు భావిస్తున్నారు. ఈతరుణంలో వృద్ధి మందగించకుండా ఉండేందుకు ఆర్‌బీఐ రేట్‌కట్‌కు మొగ్గు చూపింది. ప్రపంచవ్యాప్తంగా రేట్‌కట్‌ సైకిల్‌ ఆరంభమైందని బోఫా ఎంఎల్‌ వ్యాఖ్యానించింది. ఇప్పటికీ దేశీయ రుణ రేట్లు ఎక్కువగానే ఉన్నాయని, ఆర్‌బీఐ రేట్‌కట్‌ను బ్యాంకులు కస్టమర్లకు అందించనంతవరకు పెద్దగా ప్రయోజనం ఉండదని బ్రోకింగ్‌ సంస్థలు అభిప్రాయపడుతున్నాయి.