News

• బ్రాడ్‌కాస్టర్స్‌, డీపీవోలపై ట్రాయ్ వ్యాఖ్యలు

న్యూఢిల్లీ: టీవీ చానళ్ల సిసలైన మార్కెట్‌ రేటును కనుగొనేందుకు లేకుండా బ్రాడ్‌కాస్టర్స్‌, ఆపరేటర్లు (డీపీవో) కొత్త టారిఫ్ ఆర్డరును దుర్వినియోగం చేశారంటూ టెలికం రంగ నియంత్రణ సంస్థ ట్రాయ్ వ్యాఖ్యానించింది. చానళ్ల ఎంపిక, చార్జీలపరంగా కొత్త సమస్యలపై సంబంధిత వర్గాలు అభిప్రాయాలు తెలపాలంటూ కోరింది. టీవీ రంగంలో వ్యాపార ప్రక్రియలు క్రమబద్ధీకరించేందుకు, వివిధ వర్గాల మధ్య విభేదాలను పరిష్కరించేందుకు, చానళ్ల చార్జీల విషయంలో పారదర్శకత తెచ్చేందుకు కొత్త నిబంధనలు ఉపకరించినా.. కస్టమర్లు తాము కోరుకున్న చానళ్లను ఎంపిక చేసుకునే స్వేచ్ఛ లభించకుండా పోయిందని ట్రాయ్ పేర్కొంది. టీవీ వీక్షకులు తాము కోరుకున్న చానళ్లు మాత్రమే పొందేందుకు, నెలవారీ బిల్లులు తగ్గించుకునేందుకు ఉపయోగపడాలనే ఉద్దేశంతో గతేడాది డిసెంబర్ నుంచి ప్రభుత్వం కొత్త నిబంధనలు అమల్లోకి తెచ్చిన సంగతి తెలిసిందే. అయితే, బ్రాడ్‌కాస్టింగ్ సంస్థలు భారీ డిస్కౌంటులకు బొకేలను ఆఫర్‌ చేస్తుండటం తదితర అంశాల కారణంగా ఆయా చానళ్ల అసలు మార్కెట్ రేటును తెలుసుకునే అవకాశం లేకుండా పోతోందని తాజాగా ట్రాయ్ పేర్కొంది. పైపెచ్చు స్వల్ప మార్పులతో బొకేలను ఆఫర్ చేస్తుండటం యూజర్లను గందరగోళంలో పడేస్తోందని అభిప్రాయపడింది.