News


ఈ ఏడాది 1,100 స్టార్టప్‌లు

Wednesday 6th November 2019
news_main1573010473.png-29377

  • అయిదేళ్లలో మొత్తం 9,300 అంకుర సంస్థలు
  • మూడో అతి పెద్ద స్టార్టప్ వ్యవస్థగా కొనసాగుతున్న భారత్‌
  • నాస్కామ్ వెల్లడి

బెంగళూరు: స్టార్టప్ వ్యవస్థకు సంబంధించి భారత్ మూడో అతి పెద్ద దేశంగా కొనసాగుతోంది. ఈ ఏడాది కొత్తగా 1,100 స్టార్టప్స్‌ ఏర్పాటయ్యాయి. దీంతో గడిచిన అయిదేళ్లలో టెక్నాలజీ అంకుర సంస్థల సంఖ్య సుమారు 8,900-9,300 స్థాయికి చేరినట్లయిందని ఐటీ సంస్థల సమాఖ్య నాస్కామ్‌ మంగళవారం వెల్లడించింది. గతేడాది టెక్‌ స్టార్టప్‌ల సంఖ్య సుమారు 7,800-8,200 దాకా ఉంది. ఇదే ఊపు కొనసాగితే 2014-2025 మధ్య కాలంలో భారత స్టార్టప్ వ్యవస్థ 10 రెట్లు వృద్ధి నమోదు చేయగలదని పేర్కొంది. ఇక 2025 నాటికి యూనికార్న్‌ల (1 బిలియన్ డాలర్ల పైగా వేల్యుయేషన్ గల స్టార్టప్‌లు) సంఖ్య దేశీయంగా 95-105 శ్రేణిలో ఉండొచ్చని నాస్కామ్‌ ప్రెసిడెంట్ దేవయాని ఘోష్ తెలిపారు. 2014లో 10-20 బిలియన్ డాలర్ల స్థాయిలో ఉన్న స్టార్టప్ వ్యవస్థ వేల్యుయేషన్ 2025 నాటికి 350-390 బిలియన్ డాలర్ల స్థాయికి చేరగలదని, 10 లక్షల పైచిలుకు ఉద్యోగాల కల్పన జరగగలదని ఆమె పేర్కొన్నారు. "భారత స్టార్టప్ వ్యవస్థ వృద్ధి ఒక అద్భుత గాధ. ప్రభుత్వం, పరిశ్రమ మద్దతుతో మరింత వేగంగా 10 రెట్లు వృద్ధి సాధించడానికి పుష్కలంగా అవకాశాలు ఉన్నాయి" అని ఘోష్ వివరించారు. 16వ నాస్కామ్ ప్రోడక్ట్ సదస్సులో కార్యక్రమంలో దేశీ టెక్నాలజీ స్టార్టప్ వ్యవస్థపై నివేదిక విడుదల చేసిన సందర్భంగా ఆమె ఈ విషయాలు తెలిపారు.

స్టార్టప్‌ల కేంద్రంగా బెంగళూరు ...
సంఖ్యాపరంగా అత్యధిక టెక్నాలజీ స్టార్టప్‌లతో బెంగళూరు అగ్రస్థానంలో ఉంది. ఢిల్లీ-ఎన్‌సీఆర్‌ తర్వాత స్థానంలో ఉంది. కొత్తగా వస్తున్న టెక్ స్టార్టప్‌ల్లో 12-15 శాతం సంస్థలు వర్ధమాన నగరాల నుంచి ఉంటుండటం గమనార్హం. స్టార్టప్స్‌లోకి గతేడాది 4.2 బిలియన్ డాలర్ల పెట్టుబడులు రాగా.. ఈ ఏడాది ఇప్పటిదాకా 4.4 బిలియన్ డాలర్ల మేర పెట్టుబడులు వచ్చాయని ఘోష్ చెప్పారు. గతేడాది 17గా ఉన్న యూనికార్న్‌ల సంఖ్య ఈసారి 24కి పెరిగిందని, ఏడాది ముగిసేలోగా మరో 2-3 కొత్తగా జతవ్వొచ్చని వివరించారు. గతేడాది టెక్ స్టార్టప్‌లు ప్రత్యక్షంగా 40,000 ఉద్యోగాలు, పరోక్షంగా 1.6 లక్షల పైచిలుకు ఉద్యోగాలు కల్పించాయని చెప్పారు. ఈ ఏడాది 60,000 ప్రత్యక్ష ఉద్యోగాలు, 1.3-1.8 లక్షల పరోక్ష ఉద్యోగాల కల్పన జరిగిందని ఘోష్ వివరించారు. దేశీ స్టార్టప్‌లకు మార్కెట్‌, నిధుల లభ్యతపరమైన సవాళ్లు ఉంటున్నాయని చెప్పారు. వీటిని పరిష్కరించేందుకు ప్రభుత్వం చొరవ చూపాలని కోరారు. 



You may be interested

జీడీపీకి త్వరలో బేస్‌ ఇయర్‌ మార్పు?

Wednesday 6th November 2019

న్యూఢిల్లీ: స్థూల దేశీయోత్పత్తి (జీడీపీ) గణాంకాలకు  బేస్‌ ఇయర్‌ మారే అవకాశాలు కనిపిస్తున్నాయి. కొద్ది నెలల్లో గణాంకాలు, కార్యక్రమాల అమలు మంత్రిత్వశాఖ ఈ మేరకు నిర్ణయం తీసుకునే అవకాశం ఉందని ఉన్నత స్థాయి వర్గాలు తెలిపాయి. ప్రస్తుతం జీడీపీ గణాంకాలకు 2011-12 బేస్‌ ఇయర్‌గా ఉంది. దీనిని 2017-18కి మార్చనున్నట్లు సమాచారం. అయితే ఈ మార్పునకు సంబంధించి తుది నిర్ణయం మాత్రం ఇంకా తీసుకోలేదని, మార్పిడిపై ముందస్తు ప్రక్రియ, గణాంకాల

అక్టోబర్‌లోనూ ‘సేవలు’ బాగోలేదు!

Wednesday 6th November 2019

న్యూఢిల్లీ: దేశంలో మందగమన పరిస్థితులకు సేవల రంగం అద్దం పడుతోంది. అక్టోబర్‌లో వరుసగా రెండవనెలా ఈ విభాగం క్షీణతను నమోదుచేసుకుందని ఐహెచ్‌ఎస్‌ మార్కిట్‌ ఇండియా సర్వీసెస్‌ బిజినెస్‌ యాక్టివిటీ ఇండెక్స్‌ పేర్కొంది. 49.2గా సూచీ నమోదయ్యిందని సంబంధిత నివేదిక తెలిపింది. సెప్టెంబర్‌లోనూ సేవల రంగం క్షీణతనే (48.7) నమోదుచేసుకుంది. అయితే సెప్టెంబర్‌కన్నా అక్టోబర్‌లో పరిస్థితి కొంత మెరుగుపడ్డం కొంత సానుకూల అంశం. ఐహెచ్‌ఎస్‌ మార్కిట్‌ ఇండియా సర్వీసెస్‌ బిజినెస్‌ యాక్టివిటీ

Most from this category