News

• క్యూ2లో 21 శాతం వృద్ధి 
• ఒక్కో షేర్‌కు రూ.11 మధ్యంతర డివిడెండ్‌ 
• రూ.9,708 కోట్లకు పెరిగిన అమ్మకాలు 
• మాంద్యంలోనూ మంచి వృద్ధి సాధించాం: సీఎండీ

న్యూఢిల్లీ: ఎఫ్‌ఎమ్‌సీజీ దిగ్గజం హిందుస్తాన్‌ యూనిలీవర్‌(హెచ్‌యూఎల్‌) ఈ ఆర్థిక సంవత్సరం రెండో త్రైమాసికంలో రూ.1,848 కోట్ల నికర లాభం(స్టాండ్‌అలోన్‌) సాధించింది. గత ఆర్థిక సంవత్సరం (2018-19) క్యూ2లో ఆర్జించిన నికర లాభం(రూ.1,525 కోట్లు)తో పోల్చితే 21 శాతం వృద్ధి సాధించామని హెచ్‌యూఎల్‌ తెలిపింది. గృహ సంరక్షణ, సౌందర్య, వ్యక్తిగత సంరక్షణ విభాగాల ఉత్పత్తుల జోరు కారణంగా నికర లాభం  ఈ స్థాయిలో పెరిగిందని కంపెనీ సీఎమ్‌డీ సంజీవ్‌ మెహతా చెప్పారు. గత క్యూ2లో రూ.9,138 కోట్లుగా ఉన్న మొత్తం అమ్మకాలు ఈ క్యూ2లో రూ.9,708 కోట్లకు పెరిగాయని పేర్కొన్నారు. ఈ ఆర్థిక సంవత్సరానికి గాను ఒక్కో ఈక్విటీ షేర్‌కు రూ.11 మధ్యంతర డివిడెండ్‌ను ఇవ్వనున్నామని చెప్పారు. 

డిమాండ్‌ సమస్యలు కొనసాగుతాయ్‌....
ఈ క్యూ2లో నిర్వహణ లాభం 21 శాతం వృద్దితో రూ.2,443 కోట్లకు పెరిగిందని మెహతా పేర్కొన్నారు. గత క్యూ2లో 23.7 శాతంగా ఉన్న నిర్వహణ లాభ మార్జిన్‌ ఈ క్యూ2లో 24.8 శాతానికి పెరిగిందని తెలిపారు. ఆర్థిక మందగమన కాలంలోనూ మంచి వృద్ది సాధించామని  సంతృప్తి వ్యక్తం చేశారు. మార్జిన్లు నిలకడగా మెరుగుపడుతున్నాయని వివరించారు. సమీప భవిష్యత్తులో డిమాండ్‌ పరంగా సమస్యలు కొనసాగుతాయని పేర్కొన్నారు. 

గృహ సంరక్షణ విభాగం ఆదాయం గత క్యూ2లో రూ.3,080 కోట్లు ఉండగా, ఈ క్యూ2లో రూ.3,371 కోట్లకు పెరిగిందని మోహతా చెప్పారు. సౌందర్య, వ్యక్తిగత సంరక్షణ విభాగం ఆదాయం రూ.4,316 కోట్ల నుంచి రూ.4,543 కోట్లకు పెరిగిందని పేర్కొన్నారు. ఆహార, రిఫ్రెష్‌మెంట్‌ విభాగం ఆదాయం 8 శాం వృద్ధితో రూ.1,847 కోట్లకు చేరిందన్నారు. విల్లెమ్‌ ఉజేన్‌ను ఎగ్జిక్యూటివ్‌ డైరెక్టర్‌(ఈడీ-సప్లై చెయిన్‌)గా నియమించామని వివరించారు. వచ్చే ఏడాది జనవరి 1 నుంచి ఆయన కంపెనీ డైరెక్టర్లలో ఒకరుగా కొనసాగుతారని పేర్కొన్నారు.