News

-విశ్లేషకులు 
ఆర్థిక సంవత్సరం 2020 మొదటి త్రైమాసికానికి సంబంధించి దేశ జీడీపి 5 శాతంగా నమోదైంది. కాగా ఇది ఆరేళ్ల కనిష్టం కావడం గమనార్హం. మార్కెట్‌ సెంటిమెంట్‌ దేశ జీడీపీతో ముడిపడి ఉండడం వలన మార్కెట్‌ మరింత పతనమయ్యే అవకాశం ఉందని విశ్లేషకులు తెలిపారు. అయినప్పటికి ఈ పరిస్థితిని ఇన్వెస్ట్‌ చేయడానికి ఉపయోగించుకోవాలని సలహాయిస్తున్నారు. ‘జూన్‌ త్రైమాసికపు జీడీజీ వృద్ధి రేటు మా అంచనా కంటే తక్కువగా ఉంది. దీని ఫలితంగా పూర్తి ఆర్థిక సంవత్సరానికి సంబంధించి జీడీపీ వృద్ధి అంచనాలను 6.1 శాతానికి తగ్గించే అవకాశం ఉంది. వృద్ధి రేటు పరంగా, జూన్‌ త్రైమాసిక వృద్ధి రేటు అద్వాన్నంగా ఉంది. వచ్చే ఇతర త్రైమాసికాలలో వృద్ధి రేటు మెరుగుదలను చూడవచ్చు’ అని నార్నోలియా చీఫ్ ఇన్వెస్ట్‌మెంట్ ఆఫీసర్ శైలేంద్ర కుమార్ అన్నారు. జూన్‌ త్రైమాసికంలో అతి తక్కువ జీడీపీ వృద్ది రేటు నమోదవుతుందని మార్కెట్‌ అంచనా వేసిందని, అందువలన ఈ సంఖ్య ఆశ్యర్యాన్ని కలిగించలేదని ఆయన వివరించారు. ‘తగ్గిన జీడీపీ వృద్ధి రేటు మార్కెట్‌లను మరింత పతనం వైపు లాగుతుంది. ఆర్థిక సంవత్సరం 2019 చివరి త్రైమాసికంలో 5.8 శాతంగా నమోదైన జీడీపీ వృద్ధిరేటు జూన్‌ త్రైమాసికంలో 5 శాతంగా నమోదైంది. ఇది అంచనాల కంటే తక్కువగా ఉంది’ అని రెలిగేర్ బ్రోకింగ్ వైస్ ప్రెసిడెంట్ అజిత్ మిశ్రా అన్నారు.