News

మెటల్‌, ఫైనాన్స్‌, బ్యాంకింగ్‌, ఐటీ రంగ షేర్ల పతనంతో మార్కెట్‌కు నాలుగో రోజూ నష్టాలు తప్పలేదు. సెన్సెక్స్‌ 198 పాయింట్ల పతనమై 38,107 వద్ద, నిఫ్టీ 47 పాయింట్లు నష్టపోయి 11,313 వద్ద స్థిరపడింది. ఆర్థిక మందగమన భయాలతో ప్రపంచ మార్కెట్లల్లో నెలకొన్న అస్థిరత, నేటి నుంచి రెండు రోజుల పాటు జరగనున్న ఆర్‌బీఐ ద్రవ్యపరపతి సమీక్షా సమావేశం నేపథ్యంలో ఇన్వెస్టర్లు అప్రమత్తత, ఇటీవల అమెరికా, యూరప్‌లలో విడుదలైన బలహీన ఆర్థిక గణాంకాలు మార్కెట్‌ సెంటిమెంట్‌పై ప్రతికూల ప్రభావాన్ని చూపాయి. ఈ పరిణామాల నేపథ్యంలో ట్రేడింగ్‌ ఆద్యంతం అటు ట్రేడర్లు, ఇటు ఇన్వెస్టర్లు అమ్మకాలకే మొగ్గు చూపారు. ఇంట్రాడేలో ఒకదశలో నిఫ్టీ 103 పాయింట్లు నష్టపోయి 11,257 వద్ద, సెన్సెక్స్‌ 350 పాయింట్ల మేర క్షీణించి 37,957.56 వద్ద కనిష్టాలను నమోదు చేశాయి. అత్యధికంగా మెటల్‌ షేర్లు ఎక్కువగా అమ్మకాల ఒత్తిడికి లోనమయ్యాయి. బ్యాంకింగ్‌ రంగ షేర్ల పతనం వరుసగా ఐదోరోజూ విక్రయాలు కొనసాగడంతో బ్యాంక్‌ నిఫ్టీ ఇండెక్స్‌ 307(1.09శాతం) పాయింట్లు నష్టపోయి 28,418.50 వద్ద స్థిరపడింది. నిఫ్టీ మిడ్‌క్యాప్‌ ఇండెక్స్‌ ఫ్లాట్‌గా ముగియగా, స్మాల్‌ క్యాప్‌ ఇండెక్స్‌ అరశాతం నష్టపోయింది. ఎన్‌ఎస్‌ఈలో 150 షేర్లు ఏడాది కనిష్ట స్థాయిని తాకాయి. మరోవైపు దసరా, దీపావళి పండుగ సీజన్‌ సందర్భంగా వాహన విక్రయాలు పుంజుకోవచ్చనే ఆశాభావాన్ని అటోరంగ షేర్లకు, జీ లిమిటెడ్‌ షేర్ల ర్యాలీ ప్రభావంతో మీడియా రంగ షేర్లకు స్వల్పంగా కొనుగోళ్ల మద్దతు లభించింది. 
ఇండస్‌ఇండ్‌ బ్యాంక్‌. టాటా స్టీల్‌, కోల్‌ ఇండియా, హిందాల్కో, వేదాంత లిమిటెడ్‌ షేర్లు 3శాతం నుంచి 4.50శాతం వరకు నష్టపోయాయి. ఐఓసీ, టాటా మోటర్స్‌, జీ లిమిటెడ్‌, బీపీసీఎల్‌, యస్‌బ్యాంక్‌ షేర్లు 3శాతం నుంచి 33.50శాతం లాభపడ్డాయి.