News

నోమురా అంచనా
ప్రస్తుత ఆర్థిక సంవత్సరాంతానికి నిఫ్టీ టార్గెట్‌ 12900 పాయింట్లని ప్రముఖ బ్రోకింగ్‌ సంస్థ నోమురా ప్రకటించింది. దేశీయ మార్కెట్‌పై సానుకూలంగా ఉన్నట్లు తెలిపింది. ఏడాది కాలానికి దేశీయ మార్కెట్లపై పాజిటివ్‌గా ఉన్నామని, బడ్జెట్లో ప్రకటించిన చర్యలన్నీ పెట్టుబడి సైకిల్‌ను ముందుకు నడిపేవిగా ఉన్నాయని నోమురా ఇండియా రిసెర్చ్‌ హెడ్‌ సైయోన్‌ ముఖర్జీ చెప్పారు. రుతుపవనాలు బలహీనంగా ఉండడం, బ్యాంకింగ్‌ రంగంలో రుణ కేటాయింపులు తగ్గడమనేవి దేశీయ మార్కెట్‌కు ‍ప్రధాన అవరోధాలని చెప్పారు. ఈ భయాలు దీర్ఘకాలం కొనసాగినా, అంతర్జాతీయ రిస్కుల కారణంగా చమురు ధరలు పెరిగినా తమ అంచనాలను పునఃసమీక్షించుకోవాల్సి ఉంటుందని వివరించారు. దేశీయ ఎకానమీలో రికవరీ బలహీనంగా ఉన్నా, క్రమానుగతంగా కనిపిస్తోందన్నారు. ఇంకో రెండు త్రైమాసికాల తర్వాత ఎకానమీలో భయాలు వెనకబడతాయన్నారు. ఫైనాన్షియల్స్‌, ఇన్‌ఫ్రా, హెల్త్‌కేర్‌ రంగాలపై తాము పాజిటివ్‌గా ఉన్నామని చెప్పారు.
ఫైనాన్షియల్స్‌లో పీఎస్‌యూ బ్యాంకులు, ప్రైవేట్‌ కార్పొరేట్‌బ్యాంకులపై ఎక్కువ బుల్లిష్‌గా ఉన్నట్లు ముఖర్జీ చెప్పారు. ఇన్‌ఫ్రా రంగంలో నిర్మాణ కంపెనీలు, జల ప్రాజెక్టులకు సంబంధించిన కంపెనీలు బాగుంటాయని, హెల్త్‌కేర్‌ రంగంపై కాంట్రా ధృక్పధం కారణంగా పాజిటివ్‌గా ఉన్నామని వివరించారు. వీటితో పాటు యుటిలిటీలు, రియల్టీ రంగాలపై కూడా దృష్టి సారించవచ్చని సూచించారు. వినిమయం, ఆటో రంగాలపై అండర్‌వెయిట్‌గా ఉన్నట్లు ఆయన తెలిపారు. ఈ రంగంలో వాల్యూషన్లు చాలా ఖరీదుగా ఉన్నాయని, ఎర్నింగ్స్‌ అంచనాలు చాలా ఎక్కువగా ఉన్నాయని తెలిపారు. వీటిలోని కొన్ని కంపెనీల వాల్యూషన్లు ఎర్నింగ్స్‌ కన్నా 40, 50 రెట్లు అధికంగా ఉన్నాయన్నారు. నిఫ్టీ కంపెనీల్లో వచ్చే రెండేళ్లలో బ్యాంకింగ్‌, ఐటీ, చమురు రంగాల కంపెనీల ఎర్నింగ్స్‌లో మంచి వృద్ధి ఉంటుందని చెప్పారు.