News

ఇండిగో మాతృ కంపెనీ ఇంటర్‌గ్లోబ్‌ ఏవియేషన్‌ రెండో త్రైమాసిక ఫలితాలు మార్కెట్‌ వర్గాలను తీవ్ర నిరాశపరచడంతో శుక్రవారం ఇండిగో షేర్లు కుప్పకూలాయి. కంపెనీ నిన్న మార్కెట్‌ ముగింపు అనంతరం ఈ ఆర్థిక సంవత్సరపు క్యూ2(జులై-సెప్టెంబర్‌)లను విడుదల చేసింది. క్యూ2లో రూ. 1062 కోట్ల నికర నష్టం ప్రకటించింది. గతేడాది గతేడాది క్యూ2లో రూ. 652 కోట్ల నష్టం నమోదైంది. మొత్తం ఆదాయం మాత్రం 31 శాతం ఎగసి రూ. 8105 కోట్లను తాకింది. ఈ కాలంలో రూ. 97 కోట్ల నిర్వహణ లాభం ఆర్జించగా.. గతంలో రూ. 116 కోట్ల నష్టం నమోదైంది.  ఫలితాలను నిరాశపరచడంతో పలు బ్రోకరేజ్‌ సంస్థలు సైతం షేర్లపై రేటింగ్‌ను డౌన్‌గ్రేడ్‌ చేయడంతో పాటు షేర్ల కొనుగోళ్ల టార్గెట్‌ ధరను తగ్గించాయి. ఈ ప్రతికూల పరిణామాల నేపథ్యంలో నేడు బీస్‌ఈలో ఈ కంపెనీ షేర్లు 3.50శాతం నష్టంతో రూ.1610.00 వద్ద ట్రేడింగ్‌ను ప్రారంభించాయి. ఇంట్రాడే అమ్మకాలు మరింత పెరగడంతో ఒకదశలో 10శాతం నష్టపోయి రూ.1501.00 వద్ద ఇంట్రాడే గరిష్టాన్ని తాకాయి. ఉదయం గం.11:30నిల.కు షేర్లు క్రితం ముగింపు(రూ.1666.35)తో పోలిస్తే 9.70శాతం నష్టంతో రూ.1504.65 వద్ద ట్రేడ్‌ అవుతోంది. కాగా షేరు ఏడాది కనిష్ట, గరిష్ట ధరలు వరుసగా రూ.755.00, రూ.1911.00లుగా నమోదయ్యాయి.