News

ముంబై: ‍కేం‍ద్రంలో నరేంద్రమోదీ నేతృత్వంలోని ఎన్‌డీఏ ఘన విజయం ‘రూపాయి’ సెంటిమెంట్‌నూ బలపరిచింది. ఇంటర్‌బ్యాంక్‌ ఫారెక్స్‌ మార్కెట్లో డాలర్‌ మారకంలో రూపాయి విలువ  శుక్రవారం 49 పైసలు లాభపడి 69.53 వద్ద ముగిసింది. మోదీ ఘన విజయం, ఈక్విటీ మార్కెట్ల ర్యాలీ రూపాయిని బలోపేతం చేసినట్లు సంబంధిత వర్గాలు పేర్కొన్నాయి. ఈ వారం మొత్తంలో రూపాయి 70 పైసలు లాభపడింది. దేశీయంగా మోదీ విజయావకాశాలపై సానుకూల అంచనాలు, దేశంలోని విదేశీ నిధులు, క్రూడ్‌ ఆయిల్‌ ధరల స్థిరత్వం, ఆసియా కరెన్సీల పటిష్టత వంటి అంశాలు ఇందుకు దోహదపడ్డాయి. గురువారం రూపాయి ముగింఉ 70.02. శుక్రవారం ప్రారంభంలోనే 69.75 వద్ద ట్రేడింగ్‌ మొదలైంది. రోజంతా 69.81 - 69.50 శ్రేణిలో తిరిగింది. అక్టోబర్‌ 9వ తేదీన రూపాయి చరిత్రాత్మక కనిష్ట స్థాయి 74.39 వద్ద ముగిసింది. అయితే క్రూడ్‌ ధరల  భారీ పతనం, ఎన్నికల అనంతరం మోదీ నేతృత్వంలో కొత్త ప్రభుత్వం ఏర్పడుతుందన్న అంచనాల నేపథ్యంలో రూపాయి రెండు నెలల క్రితం 68 స్థాయినీ చూసింది. అయితే ఇటీవలి అంతర్జాతీయ వాణిజ్య ఉద్రిక్తతలు, ఈక్విటీ మార్కెట్ల పతనం, డాలర్‌ బలోపేతం, క్రూడ్‌ ధరల తిరిగి ఆందోళనకర స్థాయికి చేరుతుండడం వంటి అంశాలు రూపాయికి ప్రతికూలంగా మారాయి. తాజా ఎన్నికల ఫలితాలు తక్షణం రూపాయి సెంటిమెం‍ట్‌ను బలపరిచినా, క్రూడ్‌ ధరల పెరుగుదల, డాలర్‌ పటిష్టస్థాయి దీర్ఘకాలంలో రూపాయి విలువను ఆందోళనకు గురిచేసేవే అని నిపుణుల అంచనా.