News


చమురు చిక్కులకు.. డాలర్లతో చెక్‌!

Wednesday 8th January 2020
Markets_main1578454736.png-30746

  • ప్రస్తుతం ఫారెక్స్‌ నిల్వలు 457.5 బిలియన్‌ డాలర్లు
  • 2019లో ఒకే ఏడాది 64 బిలియన్‌ డాలర్ల పెరుగుదల
  • ప్రస్తుత నిధులతో 10 నెలల దిగుమతి అవసరాలు ఓకే
  • అంతర్జాతీయ అనిశ్చితికి డాలర్ల రక్షణ
  • ఆసియాలో అధికంగా డాలర్లను కొన్నది ఆర్‌బీఐనే
  • డాలర్ల సమీకరణలో భారత్‌ తర్వాత కొరియా, తైవాన్‌

చమురు నిల్వల ప్రధాన కేంద్రం పశ్చిమాసియాలో అమెరికా- ఇరాన్‌ ప్రతీకార చర్యలు, రెచ్చగొట్టే వ్యాఖ్యలతో చమురు ధరలు భగ్గుమన్నాయి. ఇటీవలి కాలంలో ఉన్న ధరలతో చూస్తే బ్యారెల్‌కు 5 డాలర్ల వరకు పెరిగాయి. చమురును అత్యధికంగా వినియోగిస్తూ, వినియోగంలో 80 శాతానికి పైగా దిగుమతి చేసుకుంటున్న మన ఆర్థిక వ్యవస్థకు ఈ ధరల పెరుగుదల పెద్ద ఇబ్బందే. అయితే, ఆర్‌బీఐ ముందు చూపు మన ఆర్థిక వ్యవస్థ చమురు ప్రకంపనల నుంచి తట్టుకునేలా దృఢంగా నిలిపిందని చెప్పుకోవాలి. ఎందుకంటే మన విదేశీ మారక ద్రవ్య నిల్వలు గత డిసెంబర్‌ 27వ తేదీ నాటికి 457.5 బిలియన్‌ డాలర్లకు చేరాయి. గతేడాది (2019లో) ఆర్‌బీఐ భారీ ఎత్తున డాలర్లను కొనుగోలు చేసింది. ఫలితంగా 64 బిలియన్‌ డాలర్ల మేర ఫారెక్స్‌ నిల్వలు 2019లో (డిసెంబర్‌ 27 నాటికి) పెరిగాయి. ఆసియాలోని ఇతర దేశాల్లో మరే కేంద్ర బ్యాంకు ఈ స్థాయిలో డాలర్ల కొనుగోళ్లకు దిగకపోవటాన్ని ఇక్కడ గమనించాలి. మనం చమురు దిగుమతులను అధిక శాతం డాలర్ల రూపంలోనే చేసుకుంటున్నందున... దండిగా ఉన్న డాలర్‌ నిల్వలు ఈ సమయంలో మనకు కలసిరానున్నాయి. 2019లో తైవాన్‌ 15 బిలియన్‌ డాలర్లు, థాయిలాండ్‌ 14 బిలియన్‌ డాలర్ల చొప్పున కొన్నాయి. ఇక ఇండోనేషియా, ఫిలిప్పీన్స్‌, మలేసియా, కొరియా ఇంకా తక్కువ మొత్తంలోనే కొనుగోలు చేయడం గమనార్హం. 
ఆరేళ్లలో 176 బిలియన్‌ డాలర్లు...
ఆర్‌బీఐ డాలర్ల కొనుగోళ్ల తీరును సింగపూర్‌కు చెందిన డీబీఎస్‌ గ్రూపు అధ్యయనం చేసింది. దీని ప్రకారం.. 2013 ఆగస్ట్‌ ట్యాపర్‌ టాంటమ్‌ (యూఎస్‌ ఫెడ్‌ పరిమాణాత్మక ద్రవ్య సడలింపు విధానం నుంచి వెనక్కి మళ్లడం) తర్వాత నుంచి భారత రిజర్వ్‌ బ్యాంకు మొత్తం మీద 176 బిలియన్‌ డాలర్ల మేర ఫారెక్స్‌ నిల్వలను పెంచుకుంది. పరిమాణాత్మక సడలింపు విషయంలో నిదానంగా వ్యవహరించనున్నట్టు నాడు యూఎస్‌ ఫెడ్‌ చేసిన ప్రకటనకు అంతర్జాతీయ మార్కెట్లు ప్రతికూలంగా స్పందించాయి. అమెరికా ట్రెజరీ ఈల్డ్స్‌ కఠినంగా మారడంతో వర్ధమాన మార్కెట్ల నుంచి విదేశీ ఇన్వెస్టర్లు తమ పెట్టుబడులను వెనక్కి తీసుకోవడం అధికమైంది. ఈ ఆరేళ్ల కాలంలో ఫారెక్స్‌ నిల్వల విషయంలో దక్షిణ కొరియా 76 బిలియన్‌ డాలర్లను పెంచుకుని రెండో స్థానంలో, తైవాన్‌ 65 బిలియన్‌ డాలర్ల ఫారెక్స్‌ నిల్వలను పెంచుకుని మూడో స్థానంలో ఉన్నాయి. 
10 నెలల వరకూ ఓకే..!
ప్రస్తుతం ఆర్‌బీఐ వద్దనున్న ఫారెక్స్‌ నిల్వలు పది నెలల దిగుమతుల అవసరాలను తీర్చగలవు. తాజా అంతర్జాతీయ అనిశ్చిత వాతావరణంలో రూపాయి విలువను కాపాడుకునేందుకు ఈ నిల్వలు ఆర్‌బీఐకి ఆయుధంగా పనిచేస్తాయని నిపుణులు విశ్లేషిస్తున్నారు. అంతర్జాతీయ అనిశ్చితుల నుంచి బలమైన నిల్వల ఏర్పాటు దిశగా అధికార యంత్రాంగం వేగంగా వ్యవహరిస్తున్నట్టు డీబీఎస్‌లోని భారత ఆర్థికవేత్త రాధికా రావు తెలిపారు. స్వల్పకాలిక నిధుల రాక, ఎక్స్‌టర్నల్‌ రుణాల రూపేణా వచ్చే ఒత్తిళ్లను తట్టుకునేందుకు ఈ నిల్వలు ఉపకరిస్తాయన్నారు. అయితే, నాణేనికి మరోవైపు అన్నట్టు.. పెరిగిన డాలర్‌ నిల్వలు రూపాయి మారకంపై ప్రభావం చూపించొచ్చనని చెప్పారామె. ‘‘సెంట్రల్‌ బ్యాంకు డాలర్‌ను రూపాయిగా మార్చుకోవాల్సి వస్తుంది. దీన్నే వ్యవస్థలోకి విడుదల చేయాల్సి వస్తుంది. 64 బిలియన్‌ డాలర్లు రూపాయిల్లో రూ.5.12 లక్షల కోట్లకు సమానం. అలా చేస్తే దేశీ కరెన్సీకి బలమైన డిమాండ్‌ లేదు కనక వ్యవస్థలో అధిక లిక్విడిటీకి దారితీస్తుంది’’ అని రాధికారావు వివరించారు.  



You may be interested

ఫార్మా ఎగుమతులు రెండంకెల వృద్ధి

Wednesday 8th January 2020

ప్రస్తుత ఆర్థిక సంవత్సరంలో భారత తయారీ రంగం వృద్ధి 6.2 శాతం నుంచి 2 శాతానికి పడిపోనుందని నేషనల్‌ స్టాటిస్టికల్‌ ఆఫీస్‌ వెల్లడించింది. వ్యవసాయం, నిర్మాణం, విద్యుత్‌, సహజవాయువు వంటి రంగాల వృద్ధికి స్పీడ్‌ బ్రేకర్స్‌ పడనున్నాయని తెలిపింది. అయితే ఫార్మా రంగం మాత్రం పరుగు పెడుతోంది. రెండంకెల వృద్ధితో ఆశాజనకంగా ఉంది. భారత్‌ నుంచి ఔషధ ఎగుమతులు 2019 నవంబరులో రూ.12,530 కోట్లు నమోదు చేశాయి. అంత క్రితం

ఇక రోజంతా రూపీ ట్రేడింగ్‌

Wednesday 8th January 2020

బ్యాంకులకు ఆర్‌బీఐ గ్రీన్‌సిగ్నల్‌ ఎక్స్చేంజీల్లోనూ వేళలు పొడిగించే అవకాశం ముంబై: దేశీయంగా రూపాయి ట్రేడింగ్‌ సేవలు ఇకపై 24 గంటలూ అందుబాటులో ఉండేలా రిజర్వ్‌ బ్యాంక్‌ చర్యలు తీసుకుంటోంది. ఇందులో భాగంగా రోజంతా దేశీ కరెన్సీ ట్రేడింగ్‌ సేవలు అందించడానికి దేశీ బ్యాంకులకు గ్రీన్‌ సిగ్నల్‌ ఇచ్చింది. రూపాయి ట్రేడింగ్‌ పరిమాణం భారత్‌లో కన్నా విదేశాల్లో గణనీయంగా జరుగుతుండటం, ఇక్కడ ట్రేడింగ్‌ వేళలు పరిమితంగా ఉండటం వల్ల అంతర్జాతీయ పరిణామాలను దేశీ మార్కెట్లు

Most from this category